Ollugat jáhkket ahte leat muhtun moattes geat mearridit makkár sániid sámegielas oažžu geavahit. Duohtavuohta lea ahte giellageavaheaddjit ieža dan mearridit. Lea goasii álo nu ahte lea dábálaš olmmoš guhte leat fuobmán ja hutkan sáni maid iežá nai leat geavahišgoahtán. Jus sátni leavvá de mii dasa hárjánit ja álgit ieža nai geavahit dan. Danin leat don okta sis guhte ”dohkkehat” sáni go geavahišgoađát dan.


Sánit mat váilot
Sámegiella lea áiggiid čađa leamaš badjelgehččojuvvon ja lea guhká leamaš anus dušše muhtun domenain, ja danin dávjá váilot sánit ođđaáigásaš áššiide. Fágasániid ferte hutkat, ovdánahttit – ja biđget. Sámi jorgaleddjiin lea dávjá váttis bargu. Got galgá jorgalit omd. ”förbränningsmotor”, ”klimatsmart” dahje ”mikroblogg”? Galgá go sániid luoikkahit, sánistat sátnái jorgalit dahje hutkat ođđa sáni?

Váttis jorgalit
Leat maiddái olu sámegiel sánit maid lea váttis jorgalit iežá gielaide. Go mii lea duođain ”dihinder” dahje ” köroxe”? Ja manne ii mana ovttain ruoŧagielsániin jorgalit dakkár sániid dego ”čoanohas” dahje ”juovvái”?

Giellabáidnin
Eanetlogu giella báidná. Mii luoikkahit ja heivehit sániid ja doahpagiid. Olu hálddahuslaš sánit maid geavahit Norggabealde, eai heive Ruoŧabealde daningo Norggas ja Ruoŧas leat goabbatlágán servodathálddahuslaš systemat. Dán áiggi lea eŋgelasgiella hui gievra báidnit nuoraid sámegiela. Giella lea ealli ráhkkanus ja dat rievdá geažos áiggi. Muhto vaikko lea nu de galget goitge ain boahtteáiggis gáhttet sámegiela ja sámi ovdanbuktima. Sámegiella han muitala nu olu min kultuvrra ja min eallinoainnu birra.

Sámi giellabarggut davviriikkain
Midjiide sámi álbmogii lea oktasaš giellabargu diehttelas. 1974 vuođđuduvvui sámi giellalávdegoddi (SGL) gos visot sámi gielat ledje ovddastuvvon. SGL heaittihuvvui 2011 go dat ii šat nagodan dustet dálá dárbbuid ja hástalusaid, mealgadii váilevaš resurssaid dihte. Gaskal 2013-2018 leat Ruoŧa, Norgga ja Suoma sámedikkit doaimmahan oktasaš giellaprošeavtta, Sámi Giellagáldu dainna ulbmiliin ahte ásahit bistevaš fágaorgána mas galgá leat ovddasvástádus giellaáššiin, namalassii gielladikšumis, giellarávvagiid addit, normeret giela ja dohkkehit ođđa tearpmaid. Ruhtadeapmi lea sihkkaraston juovlamánu 31. beaivái 2018, ja golbma sámedikki leat dál guorahallama got buoremusat heivešii jođihit eambbo formálalaš davviriikkalaš sámi giellaovttasbarggu Sámi Giellagáldu siskkobealde.­
­